Gute Nachricht für die Pfalz

Pfalz: Landschaft Pfalz: Burg Pfalz: Menschenmenge Pfalz: Industrie

Leseproben

Lieblingssprich aus de Bibel

Auszüge aus: Bibel uf Pälzisch, noochverzählt vum Michael Landgraf un em Erich Hollerith, Upstadt-Weier 23.08.2004

Bibelsprich aus em Neie Testament

Seelich sich die, die fer Friede sorchen. Vun denne werd ma saache, dass se die Kinner vun Gott sinn.
Mt 5, 9

Ihr sinn des Salz vun dere Welt.
Mt 5,13

Ihr sinn des Licht vun dere Welt.
Mt 5, 14

Wann ihr bidden, dann krichen er aa´. Wann ihr suchen, dann finnen er aa´. Wann ihr aakloppen, dann werd eich a´ ufgemacht.
Mt 7,7

Die G´sunde brauchen kän Dokter. Bloß die, die wu krank sinn.
Mt 9, 12

Do wu Zwee oder Drei in moim Name beisamme sinn, do bin ich aa´ debei.
Mt 18, 20

Des saach ich eich: Alles, was ihr äm vun moine ärmschde Brieder geduh habt, des habt ihr mir geduh.
Mt 25, 40

Ihr brauchen kä Angscht hawwe. Ich bin bei eich an alle Daach, bis es nimmi weider geht uf dere Welt.
Mt 28, 20

De Mensch lebt net vum Brot allä.
Lk 4,4

Ihr sollen genau so barmherzich soi, wie eiern Vadder im Himmel aa´ barmherzich is.
Lk 6, 36

Seelich sinn die, wu des Wort vun Gott heeren un sich dodenooch richden.
Lk 11, 28

De Jesus is kumme, um die zu suche un seelich zu mache, die sunscht verlore sinn.
Lk 19, 10

Wer vun moim Wasser trinkt, der werd nie mehr dorschdich soi.
Joh 4,14

Ich bin des Licht vun dere Welt. Die wu mit mir gehn, die henn des Licht vum Lewe un bleiwen net im Dunkle.
Joh 8, 12

Ich bin de Wech un die Wohret un s´Lewe. Käner kummt zum himmlische Vadder als wie durch mich.
Joh 14,6

Ich bin de Woistock un ihr sinn moi Reewe.
Joh 15, 5

Ma muss uf Gott mehr heere als wie uf die Mensche.
Apg 5, 29

Gewwe is seelicher wie nemme.
Apg 20, 35

Glaab an de Herr Jesus Christus, dann werscht du un doi Familie seelich.
Apg 16, 31

Ich schäm mich net weche em Jesus soim Evangelium. Des is nämlich ä´ Kraft, die vun Gott kummt. Un wer dodraa glaawe dut, werd glicklich fer soi ganz Lewe.
Röm 1, 16

Wann Gott fer uns is, wer kann do geche uns soi?
Röm 8, 31

S´gibt nix uf dere Welt, was uns trenne kann vum Herrgott soinere Liewe.
Röm 8, 39

S´gibt kä anneri Grundlaach fer s´Lewe als wie de Jesus Christus.
1. Kor 3,11

Jetzt awwer bleiwen de Glaawe, die Hoffnung, die Liewe, die drei. Die Liewe is awwer die Greescht vun denne.
1. Kor 13, 13

Ihr kennt eier Sorche allminanner uf Gott ablade, der sorcht fer eich.
1. Petr 5,7

Bei allem, was er machen, machen´s vun ganzem Herz.
Kol 3, 23

Wann Gott will, dann werre ma a´ lewe.
Jak 4, 15

De Jesus hot g´sacht: Hab kä Angscht! Ich bin de Erschde un de Letschde un de Lewendische vun Ewichkeit zu Ewichkeit.
Off 1,17

De Jesus werd gebore

Wie de Augustus de Kaiser vun de Römer war, do hot er a´ des Land vun de Israelidde rechiert. Sellemols hot er die Leit zähle losse, damit er gewißt hot, wem er alles Steiere abnemme kann. Do hot jeder in soi Heimat gehe misse un sich ufschreiwe losse. Desweche is a´ de Josef mit soinere Fraa Maria nooch Bethlehem losgezoche, weil do soi Sippschaft herkumme is. Awwer die Maria war im letschde Monat schwanger gewest. Do war des fer die zwee kä äfachi Rääs.

Wie se in Bethlehem aakumme sinn, henn se kä Dach iwwer´m Kopp g´habt. Bloß in äm Stall war noch Platz. Un do hot dann die Maria ihr Klänes kricht un halt in ä´ Fudderkripp geleecht, weil nix anneres do war. „Jesus“ henn die Eldere des Biewel g´heeße, des määnt uf pälzisch: „Gott dut helfe.“

Ganz in de Näh uf äm Feld is de Hirde än Engel erschiene. Der hot zu denne g´sacht: „Eich is heit ä´ Kind gebore worre. Wann des groß is, werd´s die Welt widder in Ordnung bringe.“ Do waren se all ufgereecht un sinn schnell zum Stall hiegerennt. Sie henn sich vor des Kind g´stellt un ä´ großi Frääd g´habt an dem Bobbelche.

Bis uf heit is der Daach ä´ große Frääd fer alle Mensche. Desweche duh mer nämlich Weihnachde feiere.


Zurück zum Seitenanfang
Last change: 05.03.2008